مجنون

مجنون

ولاالمجنون

 ولا يونس

 ولا عنتر

ومهما سمعتي

عن حكايات

لأهل العشق

أنا أكتر

ولامجنون

فى قلبى كلام

يخلى العقل

 يتحير

ولا يونس

فى قلبى غرام

يخلى الدنيا دى

تنور

ولا عنتر

فى قلبى آهات

تهد جبال

 وتتكسر

أناالمجنون

حياتى شجون

و تقسى عيون

  وتتحجر

 وانا العاشق

 لكل مكان

بعطر الحب

متعطر

وانا الفارس

 صديق الليل

بأمرى يلبى

وينور

أنا عبدك

أسير حبك

ورافض انى

اتحرر

ده انا المجنون

وانا يونس

وانا عنتر

  

كلمات / محمد سيد أحمد

ميمون

قبل الصلاة ع النبى

وحدت رب الكون

هاكى حكاية صبى

اسم الكريم :-  ميمون

جدو الكبير كان غبى

ده الاصل مهما يكون

والخلقة لو مش أوى

فالعبرة بالمضمون

...

كان طفل غير عادى

سلسال جدود وجدود

لون بشرته رمادى

ولسانو كان معقود

بدماغ كبير فاضى

والوش وش قرود

حكم الزمان ماضى

والشئ لأصله يعود

...

لعب الزمان لعبته

واللعبة قلبت جد

ورث الغلام عمته

البيت وفدان أرض

وكمان حول فى العين

على كام ورم فى الخد

وف ليلة كات دخلته

على واحدة مش ولا بد

كدابة آل وهمته

أمور وزى الورد

وقال الزمان حكمته

اللى انتو فاهمينها

بكرة يزول المال

والقرد يفضل قرد

كلمات / محمد سيد أحمد

أهل البلايا

أهل البلايا الصبر افضل موضعا

فرشة وملاية لمن ذا أرق مضجعا

واسمع معايا ان كنت راجل مجدعا

تبغى السلامة ففى الحكاية دى منفعا

وان كنت ماشى فخذ طريق البرطعا

ولك السلام منغما ومربعا

دايما باقول الهم أكبر بردعة

مثل الحمول أو الجبال تجمعا

فوق الخلائق من ذوات الاربعة

تلعب هموم الناس دورا مفزعا

تجعل حياتك مثل ورقة مبقعة

بجوار حائط فى زبالة مطبعة

أو كالحطام طريح أرض بمزرعة

فمصيرها اما الحريق مولعا

او فى الهواء تقاسى كيد الزوبعة

فدع الهموم وللحمول فوزعا

واقفز سعيدا مثل طفل الضفدعة

كلمات / محمد سيد أحمد

عنتر 2019

سأحكى حكايتى الليلة

لعل البوح ينسينى

بصوت يُسمع النملة

فان الصمت يشجينى

لكى لا يخبروا عبلة

فان الضرب يؤذينى

ولا قوة ولا حولا

سأرويها دكاكينى

ايديها دائماًعاملة

كخف الفيل والجملَ

أظافرها تذكرنى

 بأنصال السكاكينى

وأخشى ضربةً منها

ستأتينى ستأتينى

بأكياسٍ بلاستكتن

تقطعنى وترمينى

فلا أصبح سوى خبرٍ

بصفحات الجرانين

فأدعوا ربنا المولى

ليمهلنى الى حين

ويقضى لعبلتى الأجل

فيأخذها ويحيينى

كلمات / محمد سيد أحمد

حبيبتى

حبيبتى

ليها أحوالها     وباعشقها   كما  هية

فى   وقت    الشــــــــدة     والفيضان

فى   لــــون   الرمل  و  البستــــــــان

فى وقت     الفرح  و   الاحــــــــــزان

فى  طرحتها      الحياة    ألــــــــــوان

وباعشقها كما هية

فى الفجرية   تتكلم  وتتدلع      بحنية

وبعد الظهر غجرية

وبعد العصر تتحول   لعفريتة   وجنية

وساعة الوعد … تنسانى لا  أنا   ليها

ولا هية كمان ليا

وساعة القهر  … تنادينى  … تلاقينى

كما الرهوان جبل شامخ  حجر صوان

بقلب العاشق الولهان

وأقدم عمرى  وانا ساكت..وأنا فرحان

حبيبتى  ليها أحوالها  وذكرها المولى

فى التوراة  وفى  الانجيل وفى القرآن

كلمات / محمد سيد أحمد

خلى بالك

فى الزمن ده تخلى بالك 

من دماغك هى غلطة

تبتدى بكلمة مزاجك

والنهاية تروح أونطة 

وتلاقيك صايع وضايع

زى قطر بدون محطة

طب تعالى اسمع حكاية

ابراهيم ابن ام بطة

كان جدع والصحة كانت

رافعة راسه فى كل حتة

والنهاية يا ريتها دامت

والبداية تملى غلطة

اشترك مرة فى ازازة

وقال هاجرب بس شفطة

والليالى اياها كترت

ليلة شدة وليلة حتة

والدماغ لفت ودارت

والمزاج العالى وطى

والفلوس ولت وهربت

وابراهيم كان عنده مال

بس ضيع كل حاجة

ومد ايده للسؤال

واستحالت حال صاحبنا

والجدع بقى شئ محال

مش محصل حتى عيل

أى عيل م العيال

كلمات / محمد سيد أحمد

واحد صاحبى

واحد صاحبى على نياتو

متجوز من ست  سنين

وجعت قلبه الست حماتو

بعيد عن قلب المستمعين

مرة سبوع للواد حلاقاتو

ومرة عزومة لناس غاليين

أحمد اخوها ولطفى ولمعى

ونظمى ورسمى وما اعرف مين

أما ولادهم نكشوا حاجاتو

 تقولش ولاد عفاريت شياطين

حطوا الجزمة مكان شراباتو

ودلقوا القهوة على البطاطين

ولعبوا فى كتبه وفى مجلاتو

وجابوا مقص وراحوا قاطعين

كل زراير جلبياتو

وفكوا خياطة بنطلونين

شافهم صاحبى شخط فى مراته

جريوا مكانهم راحوا قاعدين

شافت المنظر كله حماتو

وشاورت بس بطرف العين

دخلت أوضته وقفلت بابها

وبعد شوية وراحوا طالعين

خرج الراجل لم حاجاته

وهوبيبكى بدمع العين

وبعد ما فكر فى اللى جراله

أجر أوضه وبعد يومين

بعت الشكوى لحلف الناتو

 يطلب فيها دبابتين

ينسف بيهم رجل حماتو

ويمشيها بدون رجلين

كلمات / محمد سيد أحمد